Wafa Naqvi
safar asan hai lekin use dushvar karte hain
dar-o-divar ghar ke yaad ham sau baar karte hain
inhin tarik raton se nikal aa.ega ik suraj
andheron ke safine par shab-e-gham paar karte hain
samundar ke kinare par Thaharte hain gharaunde kab
ajab kar-e-junun hai aap ye be-kar karte hain
bula lete hain tariki vo apne ghar ke angan men
ujale kyuun magar saare pas-e-divar karte hain
chhupa rahta hai dast-e-arzu ḳhuddar logon ka
baḌi mushkil se apni zaat ka iz.har karte hain
hamen sakit nahin rahna muafiq hain havaon ke
hamari ḳhaak uḌti hai ye ham iqrar karte hain
thakan uThne nahin deti kisi nakam hasrat ki
savere ḳhvab hi tere mujhe bedar karte hain
ḳhamoshi bhi to paigham-e-tamanna-e-dil-o-jan hai
zaban jin ki nahin hoti vahi takrar karte hain
zamana tere hathon par kare bai.at ye mumkin hai
yazid-e-vaqt ham tera magar inkar karte hain
Leave a Reply