Usha Bhadoriya
kahin dua to kahin harf-e-iltija Thahri
main apne aap men Duubi to be-sada Thahri
main janti huun salamat nahin koi daman
ye raushni bhi kahan kis ka aa.ina Thahri
safar tha shart magar jab bhi ek naam aaya
qadam to chalte rahe ruuh ja-ba-ja Thahri
tu darmiyan men mila darmiyan men chhuT gaya
jo ibtida thi miri hadd-e-intiha Thahri
hava ka haath pakaḌ kar guzar ga.i ḳhushbu
main teri raah men Thahri agar to kya Thahri
sabhi hain ḳhush mire chehre pe kuchh ḳharashen hain
koi nigah kahan dard-ashna Thahri
phir us ke baa’d ghuTan ne mujhe nihal kiya
mire qarib zara der ko hava Thahri
safar nasib raha sirf tere naam ke saath
tiri nazar men magar phir bhi bevafa Thahri
qarib aane ki koshish to us ne ki ‘usha’
main us ke haq men magar ḳhud hi fasla Thahri
Leave a Reply