Gunahgar to Rahmat Ko Munh Dikha Na Saka

Nushur Wahidi

gunahgar to rahmat ko munh dikha na saka

jo be-gunah tha vo bhi nazar mila na saka

tarab hai sheva-e-rindan-e-aqibat-na-shanas

jo gul na tha vo gulistan men muskura na saka

bahut ḳhafif thi kaun-o-makan ki jalvagari

miri nigah ka gosha bhi jagmaga na saka

havala-e-nigah-e-sharamgin huiin aḳhir

vo bijliyan jo kahin asman gira na saka

badi.a-kar hai zehn-e-ḳhirad-pasand magar

tasavvurat se tasvir-e-gham bana na saka

ajab nahin ki gulistan men pa-ba-gil rah jaa.e

vo bad-nasib jo ramz-e-ḳhiram pa na saka

jiya vo paak jo rakhta tha ḳhar-e-pairahan

jo gul ba-jaib tha daman kabhi bacha na saka

‘nushur’ nazuki-e-tab-e-sher kya kahiye

jahan men rah ke zamane ke naaz uTha na saka