shiddat-e-shauq se afsane to ho jaate hain
phir na jaane vahi ashiq kahan kho jaate hain
mujh se irshad ye hota hai ki samjhun un ko
aur phir bhiid men duniya ki vo kho jaate hain
dard jab zabt ki har had se guzar jaata hai
khvab tanhai ke aghosh men so jaate hain
bas yunhi kahte hain vo mere hain mere honge
aur ik pal men kisi aur ke ho jaate hain
ham to paband-e-vafa pahle bhi the aaj bhi hain
aap hi fasle le aae to lo jaate hain
koi tadbir na taqdir se lena-dena
bas yunhi faisle jo hone hain ho jaate hain
kuchh to ehsas-e-mohabbat se huiin nam ankhen
kuchh tiri yaad ke badal bhi bhigo jaate hain
Leave a Reply