Masoom Ansari
chehre se zindagi ki chamak ḳhatm ho ga.i
itna hanse ki saari lalak ḳhatm ho ga.i
har rasta kahin na kahin jaata hai magar
chalta gaya main aur saḌak ḳhatm ho ga.i
mujh se chhuḌa ke haath bahut ḳhush hai vo magar
ḳhush-rang chuḌiyon ki khanak ḳhatm ho ga.i
kis sang-dil ḳhayal ne sahma ke rakh diya
yak-laḳht aa.ine ki chamak ḳhatm ho ga.i
phulon ki dilkashi men izafa hua to hai
lekin ye kya hua ki mahak ḳhatm ho ga.i
shaḳh-e-gulab lagti hai Daali babul ki
mausam ke saath saari lachak ḳhatm ho ga.i
aaj us ka main ne aḳhiri ḳhat bhi jala diya
‘ma.asum’ umr bhar ki kasak ḳhatm ho ga.i
Leave a Reply