Marte Nahin Ab Ishq Mein Yun to Aatish-E-Furqat Ab Bhi Wahi Hai

Rashid Aazar

marte nahin ab ishq men yuun to atish-e-furqat ab bhi vahi hai

taur junun ke badle lekin soz-e-mohabbat ab bhi vahi hai

umr ki is manzil par bhi ham tujh par jaan nichhavar kar den

go vo garmi ḳhuun men nahin hai dil men qayamat ab bhi vahi hai

tum kya jaano jiina marna ham ne kin sharton par sikha

aaj bhi aise log hain jin men shauq-e-shahadat ab bhi vahi hai

kaise kaise marhale guzre jin men us ne saath diya tha

bhuul ga.e ham lekin us ki ham pe inayat ab bhi vahi hai

kitne koh-e-giran kaaTe hain kitne sanam tarashe ‘azar’

shauq-e-zuhur ki har patthar men raqsan vahshat ab bhi vahi hai