Hue Aise Ba-Dil Tere Shefta Hum Dil-O-Jaan Ko Hamesha Nisar Kiya

hue aise ba-dil tire shefta ham dil-o-jan ko hamesha nisar kiya

rah-e-ishq se phir na hatae qadam rahe mahv tire tujhe pyaar kiya

tire shauq men dil ki tabahi hui tire zauq ki us pe gavahi hui

koi dam bhi na lene diya mujhe dam mujhe dushman-e-sabr-o-qarar kiya

gai jaan qafas men bara-e-chaman chali le ke jahan se hava-e-chaman

kabhi abr-e-karam ne kiya na karam na kisi ne bayan-e-bahar kiya

jahan mahke mahak gaya saara jahan bhala itr ko bu ye nasib kahan

ba-khuda hi khata kahen mushk-bu ham tiri zulf pe sadqe nisar kiya

na lo ishq ka naam ye kahte ho kya jo ho tegh-tale bhi hamara gala

yahi ham kahe jaaen khuda ki qasam tumhen pyaar kiya tumhen pyaar kiya

tire haath se main jo shahid hua miri ruuh ka ishq murid hua

jo hayat raha to na chhode qadam jo mara to tavaf-e-mazar kiya

tire shauq ne ham ko jo khaak kiya tire zauq ne khaak se paak kiya

tire rang ne mujh pe kiya ye karam mujhe tere chaman ka ghubar kiya

tire tir-e-hadaf ki havas thi mujhe badi hasrat-e-kunj-e-nafas thi mujhe

mujhe chuuk kiya ye ghazab ye sitam na asiir kiya na shikar kiya

tujhe chaha to rang ye mit ke jame tire baagh men khaak se paak hue

mare tere chaman ki havas men jo ham to ghubar ko abr-e-bahar kiya

na adam ki jo mujh ko savari mili koi takht-e-ravan na amari mili

kai doston ne mire ho ke baham mujhe dosh par apni savar kiya

hamen is ki kahin se khabar na mili hui umr tamam magar na mili

kabhi us ne bhi haal kiya na raqam khat-e-shauq ravana hazar kiya

tire roz-e-azal se farefta hain tire husn-o-jamal ke shefta hain

tire ishq men ho gae kushta-e-gham vahi kar gae qaul jo yaar kiya

tire bas men jo aae to khaak hue jo ghubar hue bhi to khaak hue

rahe baad-e-fana bhi na chain se ham hamen gardish-e-lail-o-nahar kiya

kabhi sair-e-chaman ka na shauq hua kisi bazm ka ham ko na zauq hua

tire kuche ko jaan ke bagh-e-iram yahin bulbul-e-jan ko nisar kiya

jise chaha dil us pe nisar karen kabhi god men len kabhi pyaar karen

ye burai nasib ki vae-sitam vo harif hua jise pyaar kiya

mujhe yaar ne aa ke jo dekha hazin kaha roe ho main ne kaha ki nahin

vo kahe gae ankhon pe kyuun hai varam ‘sharaf’ un se bahana hazar kiya

Leave a Comment