Avinash Pandey
ab intishar ki hasrat nahin ḳharabe ko
jo aa rahe ho to aao ye ghar basane ko
tira vajud miri zaat ke liye kya hai
ḳhuda ka aasra jaise kisi abhage ko
zamane bhar ke masa.il men aise uljhe hain
hamare haal ka kuchh gham nahin hamare ko
ḳhat us ko likhte agar ḳhat men us ko kya likhte
ravana ham ne tahi kar diya lifafe ko
ga.i ruton men ka.i phuul aa.e the un par
ab ek barg nahin hai badan chhupane ko
main khul ke kar nahin sakta tha apna dukh zahir
koi samajh bhi na paaya mire ishare ko
har ik ke bas ka kahan hai sameTna vahshat
junun na jaan faqat ḳhaak ke uḌane ko
Leave a Reply