kab kisi gahre samundar ko hava samjhegi
sat.h par tairti maujon ko nava samjhegi
do badan dard ki lahron pe bhi mil sakte hain
is risalat ko kahan bad-e-saba samjhegi
ruuh ka zaḳhm na paḌh pa.ega gautam phir bhi
vo pujaran isi patthar ko ḳhuda samjhegi
vaqt kafir ki ḳhuda.i hai gunahgar bahut
saari ma.asum namazon ko qaza samjhegi
is haveli ki rivayat hi sharifana hai
ḳhud ko nilam chaḌha kar bhi baja samjhegi
jaane kab utrega ‘ḳhurshid’-e-basharat mujh men
kab ye tanha.i mujhe ghar-e-hira samjhegi
Leave a Reply