chuur hai shisha-e-dil ek nazar aur sahi
ik naya ḳhvab mire dida-e-tar aur sahi
kyon na do-char qadam saath bhi chal kar dekhen
hai miri raah juda tera safar aur sahi
us ki bhigi hui ankhon se chalo mil aa.en
ai miri zindagi ik zaḳhm-e-jigar aur sahi
ab ke shayad kisi manzil ka pata mil jaa.e
ra.egan lamhon men ik rahguzar aur sahi
umr to saari gharondon hi men guzri hai ‘zamir’
aḳhiri baar ye ik ret ka ghar aur sahi
Leave a Reply