Afzal Ahmad Syed
khanjar ke phal par
ek taraf tumhara naam likha hai
aur dusri taraf mera
jinhen padhna aata hai
hamen batate hain
hamen qatl kar diya jaega
jo darakht ugata hai
hamen ek seb de deta hai
ham khanjar se seb ke
do tukde kar dete hain
ham kisi se puchhe baghair zinda rahte hain
aur kisi ko batae baghair
mohabbat karte hain
main ne ginti sikhi
aur yaad rakha
tum tak pahunchne ke liye mujhe
kitni sidhiyan tai karni padti hain
ek din tum ye saari sidhiyan
nazmon ki kitab men rakh kar
mujhe de dogi
ek din main tumhen bataunga
samundar vahan se shurua hota hai
jahan se khushki nazar aani khatm ho jaae
phir ham jab chahenge
nazmon ki kitab se
ek varaq phaad kar kashti bana lenge
aur
dusra varaq phaad kar
samundar
phir ham jab chahenge
zamin ki gardish rok kar
raqs karne lagenge
nachte hue aadmi ke dil ka nishana
mushkil se liya ja sakta hai
Leave a Reply