kamre ki divaron par avezan jo tasviren hain
ahd-e-guzishta ke ḳhvabon ki bikhri hui tabiren hain
un ke ḳhat mahfuz hain ab tak mere ḳhutut ki file men
qasmen vaade ahd o paiman pyaar bhari tahriren hain
haath ki rekha dekhne vaale mera haath bhi dekh zara
bar aa.en ummiden jin se aisi kahin lakiren hain
phir ye kis ne apna kah kar di hai sada ik vahshi ko
zindan jis ke shor se larza paanv paḌi zanjiren hain
‘shams’ ki halat ka mat puchho kuchh din se ye haal hua
har dam tanha soch men baiThe daman apna chiren hain
Leave a Reply