ye kuchh badlav sa achchha laga hai
hamen ik dusra achchha laga hai
samajhna hai use nazdik ja kar
jise mujh sa bura achchha laga hai
ye kya har vaqt jiine ki dua.en
yahan aisa bhi kya achchha laga hai
safar to zindagi bhar ka hai lekin
ye vaqfa sa zara achchha laga hai
miri nazren bhi hain ab asman par
koi mahv-e-dua achchha laga hai
hue barbad jis ke ishq men ham
vo ab ja kar zara achchha laga hai
vo suraj jo mira dushman tha din bhar
mujhe Dhalta hua achchha laga hai
koi puchhe to kya batla.enge ham
ki is manzar men kya achchha laga hai
Leave a Reply