Arif Abdul Mateen
kitni hasrat se tiri aankh ka badal barsa
ye alag baat mira shola-e-gham bujh na saka
tera paikar hai vo a.ina ki jis ke dam se
main ne sau ruup men ḳhud apna sarapa dekha
ek lamhe ke liye chand ki ḳhvahish ki thi
umr bhar sar pe mire qahr ka suraj chamka
jab bhi ehsas-e-aman ba.is-e-taskin Thahra
an-ginat ḳhatron ki aahaT se dil apna dhaḌka
main aziyyat ki guphaon men karahun kab tak
be-gunahi ki saza ke liye mi.ad hai kya
tira-o-tar ḳhalaon men bhaTakta raha zehan
raat sahra-e-ana se main hirasan guzra
sehr-e-goya.i ke kis dasht ka faizan hai ye
har suḳhan lab se tire surat-e-ahu nikla
main ne jis shaḳh ko phulon se sajaya ‘arif’
mere siine men usi shaḳh ka kanTa utra
Leave a Reply