nasim-e-sub.h kyuun iThla rahi hai
ḳhuda jaane kahan se aa rahi hai
vo mil jaa.en saba to un se kahna
ye barkha rut bhi biiti ja rahi hai
kisi se duur ho jaane ki saa.at
bahut nazdik aati ja rahi hai
ye kyuun baḌhne lagi hai dil ki dhaḌkan
hamari yaad kis ko aa rahi hai
baharon ka payam aaya hai shayad
hava zanjir-e-dar khaḌka rahi hai
vo jitni chara-sazi kar rahe hain
ḳhalish kuchh aur baḌhti rahi hai
Leave a Reply