Naeem Gilani
jo ḳhvab men hua tha vaqa.i na ho
ki main pukarta rahun koi na ho
charagh be-sabab to ro nahin rahe
jo shab guzar rahi hai aḳhiri na ho
jise sukut-e-marg ka nishan kahen
ye ḳhamushi kahin vo ḳhamushi na ho
paḌi hui hai gard si jo vaqt par
ye chashm-e-ḳhvab-zad se giri na ho
mujhe ye hukm bhi suna diya gaya
ki naav men mire siva koi na ho
yaqin bhari-bahar ka bhi kuchh nahin
agar ye shaḳh-e-dard hi hari na ho
mira mo.amla ‘na.im’ aur hai
agar tiri nazar men sarsari na ho
Leave a Reply