sada bam-e-vafa se har kisi ko di ga.i lekin
kisi men bhi yahan zauq-e-vafadari nahin shayad
ḳhulus-o-mehr ke sho.alon men jo tabdil ho jaa.e
tumhare dil men chahat ki vo chingari nahin shayad
musalsal gamzan hai apni dhun men janib-e-manzil
badan ka bojh meri ruuh par bhari nahin shayad
gham-e-ulfat ko duniya se chhupa kar main kahan rakkhun
mire dil ke makan men koi almari nahin shayad
jahan par tum khaḌe ho vo ḳhud-ara.i ka parbat hai
vahan se niche aane men to dushvari nahin shayad
mujhe ye baat kahne men jhijhak hoti nahin kuchh bhi
hamara dabdaba duniya pe ab taari nahin shayad
zamana us ke rone ki adakari ka qaa.il hai
mira dil kah raha hai ye adakari nahin shayad
tumhare chhune se dhaḌkan hamari tez hoti hai
hamen ai ‘shad’ lekin dil ki bimari nahin shayad
Leave a Reply