abdul-ahad-saaz

Kabhi Numayan Kabhi Tah-Nashin Bhi Rahte Hain

kabhi numayan kabhi tah-nashin bhi rahte hain

yahin pe rahte hain ham aur nahin bhi rahte hain

bhatakti nazron men hain murtakiz nigahen bhi

guman-kadon men kuchh ahl-e-yaqin bhi rahte hain

agarche ham ko muqaddam hai rah-e-khidmat-e-khalq

jo baaz aae to apne taiin bhi rahte hain

baja shavahid o mantiq qubul bahs o dalil

pa ham khata-e-nazar ke qarin bhi rahte hain

hijab fikr-o-nazar ke utha ke dekho to

hamare fan men kai naznin bhi rahte hain

shabahaten si ghubar-e-had-e-nigah men hain

pas-e-falak kahin ahl-e-zamin bhi rahte hain

tum apne thor-thikanon ko yaad rakkho ‘saz’

hamara kya hai ki ham to kahin bhi rahte hain

More Poems

Leave a Comment