un ki raftar se dil ka ajab ahval hua
rundh gaya pis gaya mitti hua pamal hua
dasht-e-vahshat ka ilaqa mujhe imsal hua
dagh-e-sauda sifat-e-nayyar-e-iqbal hua
is bakhede se ilahi kahin chhutkara ho
ishq-e-gesu na hua jaan ka janjal hua
nazar-e-lutf na ki tu ne mire rone par
tifl-e-ashk ai mah-e-khubi na khush-iqbal hua
hain vo suufi jo kabhi nala-e-naqus suna
vajd karne lage ham dil ka ajab haal hua
pad gaya un pe mire pech men laane ka vabal
kya pareshan tire gesuon ka haal hua
daulat-e-faqr ho ai munimo aur kamli ho
fakhr kya hai jo do-shala hua rumal hua
apni qismat ka navishta jo dikhaya ham ne
hashr ke rose ghalat nama-e-aamal hua
asman ne mujhe mahrum-e-shahadat rakkha
tegh-e-qatil ke liye bakht-e-siyah-e-Dhal hua
log kahne lage kundan pe chadhae miina
sabza-e-khat se vo khush-rang tira gaal hua
tegh-e-husn ai gul-e-tar ho gai khun-aluda
mujh pe ghusse men tera munh jo bahut laal hua
tair-e-dil ki liye aap ne sayyadi ki
rishta-e-dam-e-bala zulf ka har baal hua
la-makan tak kahin thahra na mira pa-e-khayal
mazra-e-sabz-e-falak biich men pamal hua
ai ‘saba’ aap riayat na karen lafzon ki
zar-e-gul paaya jo gulchin ne to kya maal hua