Zehra Nigaah
kahin duur basti ki aghosh men
vo humakta hua ik naya ghar
apne atraf se be-khabar
nanhe bachche ke manind hansta hua
ik nae-pan ki khushbu men basta hua
hamesha mujhe aur tum ko bulata rahega
apni mutthi ke ghunghru bajata rahega
vo naya ghar jo mera tumhara nahin tha
kisi taur se bhi hamara nahin tha
kucha kucha bhatakte hue jis ke dar par
thake-hare ham tum shikasta-dil o khak-basar
tan pe bar-e-nadamat uthae hue ruk gae the
us ke divar-o-dar farsh o angan
hamen dekh kar kis tarah jhuk gae the
us ke phaile hue bazuon ne
hamen is tarah se samoya
aur aisi jagah di
ki chehron ki mitti rifaqat ki afshan bani
aur nadamat ki zardi na jaane kahan mit gai
mujh ko aisa laga jaise anmol moti
tah-e-ab se mauj-dar-mauj ladta hua
khud kinare tak aae
apna khakistari khol suraj ki tahvil men de ke
saari thakan bhuul jaae
phir shua-e-mohabbat se saara jahan jagmagae
mere dal ne dua di khudavand-e-bartar
isi raushni men nahata rahe ye naya ghar
apni mutthi ke ghunghru bajata rahe ye naya ghar
hamari tarah dusre dil-zadon ko bulata rahe ye naya ghar
Leave a Reply