Nasir Amrohvi
badli hui dildar nazar dekh rahe hain
dekhi nahin jaati hai magar dekh rahe hain
kuchh logon ki nazron men miri abla-pa.i
kuchh log mira azm-e-safar dekh rahe hain
hai samne un ke mere honTon pe tabassum
lekin vo mira dida-e-tar dekh rahe hain
yuun dekhte rahne men basarat hi ganva di
par ab bhi tiri rahguzar dekh rahe hain
ik main ki faqat un ki taraf dekh raha huun
ik vo hain ki rab jaane kidhar dekh rahe hain
pahle to mire haath qalam kar diye aur ab
hairat se mira kar-e-hunar dekh rahe hain
‘nasir’ tire shanon pe tire chahne vaale
ye bhi to ghanimat hai ki sar dekh rahe hain
Leave a Reply