Asrarul Haq Asrar
ḳhazana lutf ka jaise nafas nafas men tha
ajab surur ka aalam meri havas men tha
vahan bhi log ujalon pe naaz karte the
har aftab-e-jahan tirgi ke bas men tha
phire bhi din to use pattharon ke paanv mile
vo ek phuul jo muddat se ḳhar-o-ḳhas men tha
thakan nahin thi ye tha be-hisi ka sannaTa
ajiib karb sa ik nala-e-jaras men tha
sukut-e-qalb ka aḳhir shikar ho hi gaya
vo ek shaḳhs jo ta-umr pesh-o-pas men tha
sabhi ko tiliyan apni aziiz thiin ‘asrar’
ki jo parind tha ḳhud-saḳhta qafas men tha
Leave a Reply