yaar tujh ko mira ḳhayal to hai
ishq men itni dekh-bhal to hai
gham nahin gar ḳhushi nahin hasil
furqat-e-dost ka malal to hai
tujh pe guzri hai kya ḳhabar hai mujhe
tere jaisa hi mera haal to hai
mera haami jahan nahin to kya
shukr hai rabb-e-zul-jalal to hai
hai agar zo.am-e-bartari tum ko
ye bhi ik surat-e-zaval to hai
mere pahlu men tu nahin na sahi
mere shane pe teri shaal to hai
zindagi men yahi tamanna thi
dam-e-aḳhir tira visal to hai
us ki tamsil hi nahin hai ‘asad’
mera mahbub be-misal to hai
Leave a Reply