na rahe naama o paigham ke laane vaale
khaak ke niche gae arsh ke jaane vaale
kishvar-e-ishq ki rasmen ajab ulti dekhin
saltanat karte hain sab dil ke churane vaale
munimo alam-e-duniya hai sara-e-ibrat
jaenge su-e-adam khalq men aane vaale
boriya saath na jaega na takht-e-sultan
sab barabar hain bashar khalq se jaane vaale
koi baaqi na raha hai na rahega koi
be-nishan ho gae sab shaan dikhane vaale
na sikandar hai na daara hai na qaisar hai na jam
be-mahal khaak men hain qasr banane vaale
apne ashar ka ai ‘barq’ na kyuun shohra ho
saath hain tair-e-mazmun ke udane vaale