poet

Ho Raha Hai Tukde Tukde Dil Mere Gham-Khwar Ka

ho raha hai tukde tukde dil mere gham-khvar ka

hai mire zakhm-e-jigar men kaat tegh-e-yar ka

shor hai ghul hai jahan men murdan-e-dushvar ka

ek chalta vaar hai tegh-e-nigah-e-yar ka

naghma dilkash hai dushman andalib-e-zar ka

hai qafas men band hona kholna minqar ka

mast kuchh aisa huun chashm-e-nim-e-mast-e-yar ka

zarf khali janta huun saghar-e-sarshar ka

kya kahun kya haal hai mujh na-tavan-o-zar ka

huun nigah-e-vapsin apni dil-e-bimar ka

asman phirta hai hasb-e-mudda-e-muddai

raah par laana ghazab hai aise kaj-raftar ka

bal be-bad-khui mizaj-e-yar men sau bal pade

ek bal nikla jo tar-e-gesu-e-kham-dar ka

dast-e-saqi par lagae aankh rahta hai mudam

jam-e-mai hai dida-e-hasrat kisi mai-khvar ka

kis qadar bashshash hai asrar se khali nahin

rang mera ud gaya munh dekh kar sofar ka

main giraftar-e-vafa huun chhut ke jaunga kahan

baal bandha chor huun har tar-e-zulf-e-yar ka

koi ik gardish to ho aisi bhi haan ai chashm-e-yar

shaikh puchhe mujh se rasta khana-e-khummar ka

vaah re qismat ki vo mere muqaddar men pada

aah ne jo bal nikala charkh-e-kaj-raftar ka

le chalo vaaiz ko hathon-hath uthae mai-kasho

pasban chal kar bana do khana-e-khummar ka

jaan sunne valon ki vaaiz labon par aa gai

vaah kya kahna hai hazrat aap ki guftar ka

hai jo uftadon se kuchh nafrat to nafrat hi sahi

kyuun zamin par gir pada saaya teri divar ka

shakl-e-marham dekh kar Darta hai mera zakhm-e-dil

khol kar aankh apni dekha hai jo munh sofar ka

naala mere lab pe aata hai jo sau sau naaz se

koi partav le uda shayad tiri raftar ka

ye to zahir hai ki vasl un ka kahan aur ham kahan

lekin is paigham men kuchh lutf hai takrar ka

dil ko le ja mujh se ya to aap le ya baant de

par ye hissa hai teri gesu ke ik ik taar ka

al-aman us burrish-e-tegh-e-nazar se al-aman

manti hai barq bhi loha teri talvar ka

haath sambhla rakhiyo ai mashshata-e-jadu-taraz

ik jahan-e-dil hai basta turra-e-tarrar ka

huun to divana vale hushyari-e-matlab to dekh

sar bhi phoda DhunD kar patthar tiri divar ka

kuchh idhar se arz matlab aur udhar se kuchh nahin

ik judagana maza hai vasl men takrar ka

kitna gustakhi se khincha hai tujhe aghosh men

main gale ka haar huun tere gale ke haar ka

kyuun nahin girta mire afat-zadon par haae haae

asman bhi hai magar saaya tiri divar ka

chhu gai kafir hava kis ki nigah-e-garm se

phuul kumlaya hua hai kuchh gul-e-rukhsar ka

milti hai akhir ko kuchh kaifiyat-e-soz-o-gudaz

saiqa hissa hai pahla talib-e-didar ka

ek jalva par chamak uthti hai sab aqlim-e-ishq

kaun aalam hai hamare dida-e-bedar ka

asman rakhta hai ankhen mehr-o-mah se us se puchh

kaun aalam hai hamare dida-e-bedar ka

husn men khud-raftagi hai to nahin maane hijab

bu-e-gul ko phandna kya baagh ki divar ka

vo hi apni chaal hai koi mare koi jiye

le ude saara chalan tum charkh-e-kaj-raftar ka

nakhun-e-shamshir-e-qatil ko dua dete hain ham

uqda khola khuub ‘anvar’ murdan-e-dushvar ka

More Poems

Leave a Comment