aisa bhi nahin bhule se ḳhvahish hi nahin ki
paane ki use shauq se koshish hi nahin ki
us ne tabhi nirvan ke qabil nahin jaana
us but ki dil-o-jan se parastish hi nahin ki
barsa vo mire jote hue khet pe ik baar
badal ne palaT kar kabhi barish hi nahin ki
us husn-e-mujassam ko shikayat hai ki main ne
ghairon ki tarah us ki sata.ish hi nahin ki
main samne us shaḳhs ke dil khol ke rakhta
ahval ki us ne kabhi pursish hi nahin ki
haq par mire hone men koi shak to nahin tha
is martaba kya jaan ke nalish hi nahin ki
masnad mujhe darbar men milti bhi to kaise
mil kar kisi darbari se sazish hi nahin ki
shayad ki ḳhushamad se qalam rok na paata
nahaq kisi hakim ne navazish hi nahin ki
Leave a Reply