Rahbar Jaunpuri
bikhra bikhra hasti ka shiraza hai
divaron par ḳhuun abhi tak taaza hai
tum par koi vaar na hoga pichhe se
dost nahin ye dushman ka darvaza hai
ik ik kar ke saari qadren TuuT ga.iin
ye apni ḳhuddari ka ḳhamyaza hai
kaun kisi ki sunta hai is basti men
chiḳh tumhari sahra ka avaza hai
andar se sab qatil hain sab ḳhuni hain
chehron par iḳhlas ka jin ke ghaza hai
ham-saya hi ham-sa.e ko luTega
‘rahbar’ mera aisa ab andaza hai
Leave a Reply