pahle hota agar shu.ur itna
shisha-e-dil na hota chuur itna
ishq is se hi tha hua ehsas
ho gaya jab vo mujh se duur itna
kah na paa.e ki be-qusur hain ham
ho gaya ham se be-qusur itna
ḳhvab men bhi safar nahin hota
jism hai ab thakan se chuur itna
tu bhi miTTi ka ek putla hai
kis liye hai tujhe ghurur itna
lauT aana bhi ab nahin mumkin
ja chuka hai vo ham se duur itna
maut ke vaqt paas aa jaana
kaam karna mira zarur itna
Leave a Reply