abbas-tabish

Ab Adhure Ishq Ki Takmil Hi Mumkin Nahin

ab adhure ishq ki takmil hi mumkin nahin

kya karen paigham ki tarsil hi mumkin nahin

kya use samjhaun kaghaz par lakiren khinch kar

jazba-e-benam ki tashkil hi mumkin nahin

aise mausam men bhi sharh-e-dil kiye jaata huun main

jab ki is ijmal ki tafsil hi mumkin nahin

kis jagah ungli rakhun kis harf ko kaise padhun

ayat-e-imkan tiri tartil hi mumkin nahin

tohmat-e-rusvai kaise ishq par rakhta koi

aise kamon men to aisi Dhiil hi mumkin nahin

kunj-e-nisyan men pade dhundla gae us ke nuqush

ab to us khush-rang ki tamsil hi mumkin nahin

aur bhi kuchh suraten ban jaengi rusvai ki

ishq men ‘tabish’ faqat tazlil hi mumkin nahin

More Poems

Leave a Comment