Ghulam Mohammad Qasir
apne ash.ar ko rusva sar-e-bazar karun
kaise mumkin hai ki main mid.hat-e-darbar karun
dil men maqtul ki tasvir liye phirta huun
aur qatil se aqidat ka bhi iz.har karun
yahi manshur-e-mohabbat hai ki vo paikar-e-zulm
jis ko nafrat se navaze main use pyaar karun
ab mire shahr ki pahchan hai ik vada-shikan
shahriyat badlun ki tariḳh ka inkar karun
raat bhar jaag ke tamir karun qasr-e-umid
sub.h-e-takmil se pahle use mismar karun
Leave a Reply