Ro-Dho Ke Sab Kuchh Achchha Ho Jata Hai

ro-dho ke sab kuchh achchhā ho jaatā hai

man jaise rūThā bachcha ho jaatā hai

kitnā gahrā lagtā hai ġham kā sāġhar

ashk bahā luuñ to uthlā ho jaatā hai

logoñ ko bas yaad rahegā tāj-mahal

chhappar vaalā ghar qissa ho jaatā hai

miT jaatī hai miTTī kī soñdhī ḳhushbū

kahne ko to ghar pakkā ho jaatā hai

niiñd ke ḳhvāb khulī āñkhoñ se jab dekhūñ

dil kā ik konā ġhussa ho jaatā hai

Leave a Comment