Haidar Ali Aatish
na-fahmi apni parda hai didar ke liye
varna koi naqab nahin yaar ke liye
nur-e-tajalli hai tire ruḳhsar ke liye
ankhen mari kalim hain didar ke liye
fidye bahut us abru-e-ḳhamdar ke liye
chu rang ki kami nahin talvar ke liye
qaul apna hai ye sub.ha-o-zunnar ke liye
do phande hain ye kafir-o-din-dar ke liye
lutf chaman hai bulbul gulzar ke liye
kaifiyat-e-sharab hai mai-ḳhvar ke liye
seri na hogi tishna-e-didar ke liye
paani nahin chah-e-zaqan-e-yar ke liye
utni hi hai numud meri yaar ke liye
shohra hai jis qadar mare ash.ar ke liye
dasht adam se aate hain baagh jahan men ham
be-dagh lala-o-gul be-ḳhar ke liye
shamshad apne tire ko beche to lijiye
is laala ro ki lipaTti dastar ke liye
do ankhen chehre par nahin tere faqir ke
do Thekre hain bhiik ke didar ke liye
surma lagaya kijiye ankhon men mehrban
iksir ye sufuf hai bimar ke liye
halqa men zulf-e-yar ki moti piroiye
dandan zarur hain dahan-e-mar ke liye
guft-o-shunid men huun basar din bahar ke
gul ke liye hai gosh zaban ḳhaar ke liye
be-yar sar paTakne se hilta hai ghar mira
rahta hai zalzala dar-o-divar ke liye
baiTha jo us ke saaya men divana ho gaya
saaya pari ka hai tiri divar ke liye
bulbul hi ko bahar ke jaane ka gham nahin
har barg haath malta hai gulzar ke liye
ai shah-e-husn zulf o ruḳh o gosh chashm o lab
kya kya ilaqe hain tiri sarkar ke liye
chaal abr ki chala jo gulistan men jhuum kar
ta.us ne qadam tire rahvar ke liye
aaya jo dekhne tire husn-o-jamal ko
pakḌa gaya vo ishq ke begar ke liye
hajat nahin banao ki ai naznin tujhe
zevar hai sadgi tire ruḳhsar ke liye
bimar tandurust ho dekhe jo ro.e yaar
kya chashni hai sharbat didar ke liye
is badshah-e-husn ki manzil men chahiye
bal-e-huma ki par chati divar ke liye
sauda-e-zulf-e-yar men kafir hua huun men
sumbul ke taar chahiyen zunnar ke liye
zanjir o tauq jo ki hai bazar-e-dahr men
sauda hai us pari ke ḳharidar ke liye
chuna banenge ba.ad-e-fana apne ustuḳhan
daulat sara.e yaar ki divar ke liye
ma.ashuq ki zaban se hai dushnam dil pazir
shirini zahr hai tiri guftar ke liye
jaan se aziiz tar hai mare dil ko daagh ishq
mahtab lahad ki shab-e-tar ke liye
vo mast ḳhvab chashm hai koi bala-e-bad
kya martaba hai fitna-e-bedar ke liye
ḳhalvat se anjuman ka kahan yaar ko dimagh
vo jins be-baha nahin bazar ke liye
pahna hai jab se tu ne shab maah men use
kya kya shagufe phulte hain haar ke liye
chhakḌa hue hain soch ke rah-e-vafa men paaon
pahiye laga.iye unhen raftar ke liye
jo mushtari hai banda hai us ḳhush-jamal ka
yusuf bane ghulam ḳharidar ke liye
sone ke patte hoven har ik gul ke kaan men
maqdur ho jo bulbul gulzar ke liye
gul-ha-e-zaḳhm se huun shahadat-talab nihal
taufiq-e-ḳhair ho tiri talvar ke liye
andher hai jo dam ki na is ke ho raushni
yusuf mira charagh hai bazar ke liye
ehsan jo ibtida se hai atish vahi hai aaj
kuchh intiha nahin karam-e-yar ke liye
Leave a Reply