Afroz Rizvi
yuun sitam ki na intiha kiije
tauba kiije khuda khuda kiije
pyaar men kham hai ye sar-e-taslim
aap ab janiye ki kya kiije
qarz koi bhi ham nahin rakhte
aap chahat ki intiha kiije
tod kar shisha-e-yaqin mera
lutf-e-azar kuchh siva kiije
khvahishen dil men jab sulagti hon
kaise jiine ka aasra kiije
jaan liije ki saath hai ‘afroz’
aap jab jab mujhe sada kiije
Leave a Reply