Ruchi Darolia
ik safar hota raha aur ruk ga.i main
chal raha tha rasta aur ruk ga.i main
ishq tha donon ko fitrat muḳhtalif thi
vo bhaTakta hi raha aur ruk ga.i main
har dafa avaz sun kar main palaT di
phir na jaane kya hua aur ruk ga.i main
yaad ke lamhe men ik arsa bitaya
vaqt ankhon se baha aur ruk ga.i main
lams ka kaisa asar sanson pe hoga
khel men us ne chhua aur ruk ga.i main
is qadar ankhon se us ko pi liya tha
mujh men vo bahta raha aur ruk ga.i main
ja rahi thi chhoḌ kar kirdar apna
naam aaya aap ka aur ruk ga.i main
Leave a Reply