mohabbat ki mata-e-javedani le ke aaya huun
tire qadmon men apni zindagani le ke aaya huun
kahan sim-o-guhar jin ko luTa.un tere qadmon par
bara-e-nazr ashkon ki ravani le ke aaya huun
tujhe jo puchhna ho puchh le ai davar-e-mahshar
main apne saath apni be-zabani le ke aaya huun
zamin-o-mulk ke badle dilon par hai nazar meri
achhuta ik tariq-e-hukmarani le ke aaya huun
mire zaḳhm-e-tamanna dekh kar pahchan lo mujh ko
tumhari hi ata-karda nishani le ke aaya huun
mire ash.ar men muzmar hain lakhon dhaḌkanen dil ki
main ik duniya ka gham dil ki zabani le ke aaya huun
mohabbat naam hai betabi-e-dil ke tasalsul ka
mohabbat ki main ‘darshan’ ye nishani le ke aaya huun
Leave a Reply