dekhun huun yuun main us sitam-ijad ki taraf
juun said vaqt zabah ke sayyad ki taraf
ne daana ham qayas kiya ne lihaz-e-dam
dhans gae qafas men dekh ke sayyad ki taraf
sabit na hove khuun mira roz-e-baz-purs
bolenge ahl-e-hashr so jallad ki taraf
patthar ki lekh tha sukhan us ka hazar haif
boli zaban-e-tesha na farhad ki taraf
turra ke tere vaste sad-chob-e-shan-a-dar
qumri gai hai katne shamshad ki taraf
‘sauda’ tu is ghazal ko ghazal-dar-ghazal hi kah
hona hai tujh ko ‘mir’ se ustad ki taraf