Guman Tha Ya Teri KHushbu Yaqin Ab Bhi Nahin

Zia Jalandhari

guman tha ya tiri ḳhushbu yaqin ab bhi nahin

nahin hava pe bharosa to kuchh ajab bhi nahin

khilen to kaise khilen phuul ujaaḌ sahra men

sahab-e-ḳhvab nahin girya-e-talab bhi nahin

hansi men chhup na saki ansuon se dhul na saki

ajab udasi hai jis ka koi sabab bhi nahin

Thahar gaya hai mire dil men ik zamane se

vo vaqt jis ki sahar bhi nahin hai shab bhi nahin

tamam umr tire iltifat ko tarsa

vo shaḳhs jo hadaf-e-navak-e-ghazab bhi nahin

gila karo to vo kahte hain yuun raho jaise

tumhare chehron pe ankhen nahin hain lab bhi nahin

mufahamat na kar arzan na ho bharam na ganva

har ik nafas ho agar ik salib tab bhi nahin

bura na maan ‘ziya’ us ki saf-goi ka

jo dard-mand bhi hai aur be-adab bhi nahin