Hath Hamare Sab Se Unche Hathon Hi Se Gila Bhi Hai

Rais Farogh

haath hamare sab se unche hathon hi se gila bhi hai

ghar aise ko saunp diya jo aag bhi hai aur hava bhi hai

apni ana ka jaal kisi din pagal-pan men toḌunga

apni ana ke jaal ko main ne pagal-pan men buna bhi hai

diye ke jalne aur bujhne ka bhed samajh men aa.e to kya

isi hava se jal bhi raha tha isi hava se bujha bhi hai

raushniyon pe paanv jama ke chalna ham ko aaya nahin

vaise dar-e-ḳhurshid to ham par gaahe gaahe khula bhi hai

dard ki jhil-mil raushniyon se baara ḳhvab ki duuri par

ham ne dekhi ek dhanak jo sho.ala bhi hai sada bhi hai

tez hava ke saath chala hai zard musafir mausam ka

os ne daman thaam liya to pal-do-pal ko ruka bhi hai

sahil jaisi umar men ham se sagar ne ik baat na ki

lahron ne to jaane kya kya kaha bhi hai aur suna bhi hai

ishq to ik ilzam hai us ka vasl ka to bas naam hua

vo aaya tha qatil ban ke qatl hi kar ke gaya bhi hai