Ishrat Zafar
charon taraf ḳhala men hai gahra ghubar sa
phir bhi kahin pe hai yunhi kuchh ashkar sa
kya phuTta hai dil ki zamin se ba-rang-e-gham
kya tairta hai aankh men naqsh-e-bahar sa
bikhre hain mere gird nishan-e-qadam mire
khincha hai main ne apne liye bhi hisar sa
fursat jo ho to khul ke baras meri ḳhaak par
ban ja.un main bhi ek shajar saya-dar sa
tanha daraḳht main bhi huun us ke kanar men
vo bhi mire qarib hai ik juebar sa
‘ishrat’ udaas taaq pe ye zard-ru charagh
tanha.iyon men meri hai ik gham-gusar sa
Leave a Reply