Fasad-E-duniya Mita Chuke Hain Husul-E-Hasti Mita Chuke Hain

fasad-e-duniya mita chuke hain husul-e-hasti mita chuke hain

khudai apne men pa chuke hain mujhe gale ye laga chuke hain

nahin nazakat se ham men taqat uthaen jo naz-e-hur-e-jannat

ki naz-e-shamshir-e-pur-nazakat ham apne sar par utha chuke hain

najat ho ya saza ho meri mile jahannam ki paun jannat

ham ab to un ke qadam pe apna gunah-bhara sar jhuka chuke hain

nahin zaban men hai itni taqat jo shukr laaen baja ham un ka

ki dam-e-hasti se mujh ko apne ik haath men vo chhuda chuke hain

vajud se ham adam men aa kar makin hue la-makan ke ja kar

ham apne ko un ki tegh kha kar mita mita kar bana chuke hain

yahi hain adna si ik ada se jinhon ne barham hai ki khudai

yahi hain akasr qaza ke jin se farishte bhi zak utha chuke hain

ye kah do bas maut se ho rukhsat kyuun nahaq aai hai us ki shamat

ki dar talak vo masih-khaslat miri ayadat ko aa chuke hain

jo baat maane to ain shafqat na maane to ain husn-e-khubi

‘rasa’ bhala ham ko dakhl kya ab ham apni halat suna chuke hain