Pawan Kumar
kahin to intiha bhi ho kisi ke intizar ki
jiyenge aur kab talak ye zindagi udhar ki
milegi fat.h ya shikast vaqt hi bata.ega
main laḌ raha huun zindagi se jang ar-par ki
bhaTak rahe the muddaton se ham bhi jism-o-jan liye
use bhi ek umr se talash thi shikar ki
samajh sake na ham kabhi kisi ki be-yaqiniyan
bhari hui thi aankh men to dhuul e’tibar ki
junun hava taḌap hui ḳhalish hui ki gham hua
ye daulaten hain ishq ki ye ne.amaten hai pyaar ki
qadam mire jam hue hain ek hi maqam par
vo khinch kar chala gaya lakir yuun hisar ki
use kisi ki tarah kyuun bata rahe ho ai ‘pavan’
misal DhunDte ho kyuun ḳhuda ke shahkar ki
Leave a Reply