Iftikhar Raghib
kyon kisi se ho shikayat aap ko
aap hi se hai mohabbat aap ko
har taraf raqsan fareb-e-iltifat
muskurane ki hai aadat aap ko
jaane kab tak sabr karna hai hamen
jaane kab hogi nadamat aap ko
quvvat-e-bardasht meri kam na ho
aur ḳhuda rakhe salamat aap ko
farq paḌta kuchh to karta arz kuchh
kya suna.un dil ki durgat aap ko
muskura deta huun main taklif men
aur ho jaati hai zahmat aap ko
kis ko ‘raghib’ ab vafa ka paas hai
kyon na ham samjhen ghanimat aap ko
Leave a Reply