duniya ki is bhiiḌ men kho ga.e jaane kitne log
in ankhon se ojhal ho ga.e jaane kitne log
sadme sahte sahte saari umren biit ga.iin
aur zamin ko oḌh ke so ga.e jaane kitne log
kuchh logon ke ghar men utri ḳhushiyon ki barat
aur ghamon ke bojh ko Dho ga.e jaane kitne log
vaqt ke is bahte dariya men ḳhamoshi ke saath
apni naav aap Dubo ga.e jaane kitne log
ek nazar men us ne har ik dil ko jiit liya
ek nazar men us ke ho ga.e jaane kitne log
ashkon ki barsat men bah ga.i mahjuri ki raakh
apne dil ke daagh ko dho ga.e jaane kitne log
Leave a Reply