Rashid Taraz
ku-e-qatil se jo guzrega bikhar ja.ega
par yahan ḳhauf kise hai ki vo mar ja.ega
shahriyat ke jahan aa.iin se chhin jaa.en huquq
aisi tarmim se kya mulk sanvar ja.ega
haq ki avaz men avaz milate chaliye
karvan baḌhta rahega ye jidhar ja.ega
chal rahe hain jo andheron se muqabil ho kar
aḳhir-e-shab inhen paigham-e-sahar ja.ega
aaj bhi us ko himayat hai ḳhuda ki hasil
ban ke mish.al jo sar-e-rah-guzar ja.ega
jo jala.enge charaghon ko lahu se apne
un ke hamrah ujalon ka asar ja.ega
jo qadam uTThega ahkam-e-haqiqat pe ‘taraz’
us ki manzil pe ye anvar-e-safar ja.ega
Leave a Reply