hue hain raam pitam ke nayan ahista-ahista
ki jyuun phande men aate hain hiran ahista-ahista
mira dil misl parvane ke tha mushtaq jalne ka
lagi us shama suun akhir lagan ahista-ahista
gireban sabr ka mat chaak kar ai khatir-e-miskin
sunega baat vo shirin-bachan ahista-ahista
gul o bulbul ka gulshan men khalal hove to barja hai
chaman men jab chale vo gul-badan ahista-ahista
‘vali’ siine men mere panja-e-ishq-e-sitamgar ne
kiya hai chaak dil ka pairahan ahista-ahista
Leave a Reply