tire ḳhayal ke badal utar ke aa.e hain
tabhi to ye mire aansu ubhar ke aa.e hain
na.i ruton men khile gul to ye hua mahsus
purane dard naya bhes dhar ke aa.e hain
hamari ankhon men kuchh der Duub kar dekho
tumhare ḳhvab yahin se guzar ke aa.e hain
zaruri bazm se uThna hua to uTh aa.e
ta.alluqat kahan tark kar ke aa.e hain
ye sarhaden kahan hoti hain har kisi ke liye
idhar barasne ko badal udhar ke aa.e hain
akele ja ke bhi lauTe nahin akele ham
hamare saath manazir safar ke aa.e hain
Leave a Reply