Shaz Tamkanat
main lauT aa.uun kahin tu ye sochta hi na ho
ki raat der ga.e tera dar khula hi na ho
nahin ki ziist se kuchh vasta paḌa hi na ho
main kaise manun tira dil kabhi dukha hi na ho
talash kar use divar-o-dar ke chehron men
ajab nahin tiri mahfil se vo uTha hi na ho
ik e’timad-e-vafa hai ki ji raha huun main
ki mere haal ka shayad use pata hi na ho
ye rasta to usi dar pe ja ke rukta tha
ki vo ḳhafa hai to ye rasta muḌa hi na ho
main yunhi us se ḳhafa huun magar mujhe Dar hai
manane vaala haqiqat men ḳhud ḳhafa hi na ho
mujhe to tujh pe ḳhud apna guman guzarta hai
tira thaka hua lahja miri dua hi na ho
gunah aur hasin, ahrman ke bas men nahin
sitam-zarif koi banda-e-ḳhuda hi na ho
main sochta huun ki ap-apni dushmani kya hai
mira vajud miri zaat se juda hi na ho
baḌe-baḌon ke nasheb-o-faraz dekhe hain
koi mile to sahi jis ka sar jhuka hi na ho
na jaane kitne hain sayyargan-e-na-dida
tu intiha jise kahta hai ibtida hi na ho
vo laakh gham sahi aisa nahin ye duniya hai
ki ‘shaz’ us se bichhaḌ kar kabhi hansa hi na ho
Leave a Reply