rudad-e-jan kahen jo zara dam mile hamen
us dil ke raste men ka.i ḳham mile hamen
labbaik pahle ham ne kaha tha rasul-e-husn
ho kar-zar-e-ishq to parcham mile hamen
aa.e ik aisa zaḳhm jo bharna na ho kabhi
ya.ani har ek zaḳhm ka marham mile hamen
din men jahan sarab mile the hamen vahan
aa.i jo raat qatra-e-shabnam mile hamen
tum jaise aur log bhi honge jahan men
ye baat aur hai ki bahut kam mile hamen
jab saath the to mil ke bhi milna na ho saka
jab se bichhaḌ ga.e ho to paiham mile hamen
aur phir hamen bhi ḳhud pe bahut pyaar aa gaya
us ki taraf khaḌe hue jab ham mile hamen
jo umr-bhar ka saath nibhata na mil saka
vaise to zindagi men bahut gham mile hamen
Leave a Reply