ḳhaar ko phuul kaho dasht ko gulzar kaho
aur is jabr ko azadi-e-afkar kaho
jin ke hathon men alam aur na kamar men shamshir
vo bhi kahte hain hamen qafila-salar kaho
main to ik shoḳh ke daman se karunga ta.abir
tum use shauq se but-ḳhane ki divar kaho
zulf bahke to use bad-e-baharan samjho
chand nikle to use sho.ala-e-ruḳhsar kaho
kaj-kulahon ke liye sang-e-malamat bhi hain phuul
sar pe aa.en to inhen zinat-e-dastar kaho
mere sheron men dhaḌakta hai dil-e-mustaqbil
mujh ko chaho to na.e daur ka fankar kaho
main ne Dhaa.e hain rivayat ke bosida mahal
tum mujhe shauq se ‘ghalib’ ka taraf-dar kaho
Leave a Reply