rang baten karen aur baton se ḳhushbu aa.e
dard phulon ki tarah mahke agar tu aa.e
bhiig jaati hain is ummid pe ankhen har shaam
shayad is raat vo mahtab lab-e-ju aa.e
ham tiri yaad se katra ke guzar jaate magar
raah men phulon ke lab sayon ke gesu aa.e
vahi lab-tishnagi apni vahi targhib-e-sarab
dasht-e-ma.alum ki ham aḳhiri had chhu aa.e
maslahat-koshi-e-ahbab se dam ghuTta hai
kisi janib se koi na.ara-e-yahu aa.e
siine viran hue anjuman abad rahi
kitne gul-chehra ga.e kitne pari-ru aa.e
azma.ish ki ghaḌi se guzar aa.e to ‘ziya’
jashn-e-gham jaari hua ankhon men aansu aa.e
Leave a Reply